Hee leu, kom toch hier
Want wi-j gaot an 't boksebier
Umdat de tied neet stille steet
En krek as 't bier in de rondte geet

Hee leu kom toch hier
Want wi-j gaot an 't boksebier
I-j kont van 't feest naor 't wark op an
De daagse bokse he'j al an

't Hong al jaoren in de loch
Van Fientjen en den jongen van te Bogt
Zee waarn zo'n betjen haoste klaor met bouwen
En iederene wis: dee mosten trouwen

De buurte kennen eur naoberplicht
Een feesjen wodden too an-e-richt
Zee gongen an 't preuven en an 't keuren
Zo da'j 't wieterop nog konnen heuren

En daor ha'j Beernd van Kuperi-j
Nog altied zonder vri-jeri-j
Hef zich 't verdreet in 't bier verzoppen
En is allene in 't heuj ekroppen

As Gradus Jehan no nog zol laeven
Jao dan zo'j es wat belaeven
Zekers ston hee dan veuran
Onwies zoepen kon den man

En 's anderenveurmeddagens,
Too de melkboer langs kwam bellen
Kon nemes em vertellen
Hoo late 't feitelek was
De gadiens half dichte en de deure too
En 't volk nog dikke as ne koo